ای چالان کا دوسرا روز، 24 گھنٹوں میں مزید 4 ہزار 301 شہری نشانے پر آ گئے

شہر قائد میں ای چالان کے دوسرے دن چوبیس گھنٹوں کے دوران مزید 4ہزار 301 شہریوں کے چالان کیے گئے

ای چالان کے آغاز کے بعد گزشتہ روز دوسرا دن تھا، جس میں مکمل 24 گھنٹوں کی مانیٹرنگ رپورٹ سامنے آ گئی ہے، اس دوران ٹریفک قوانین کی مختلف خلاف ورزیوں پر 4 ہزار 301 شہریوں کے چالان کیے گئے

سب سے زیادہ چالان سیٹ بیلٹ کی خلاف ورزی پر کیے گئے جو 2 ہزار 290 ہیں، اس کے بعد تیز رفتاری سے ڈرائیونگ پر 845، بغیر ہیلمٹ 655، لال سگنل جمپ کرنے پر 306، دوران ڈرائیونگ موبائل فون استعمال کرنے پر 162 چالان کیے گئے۔

غیر قانونی پارکنگ پر 15، ون وے اسٹریٹ پر رانگ وے آنے پر 16 اور اوور لوڈنگ پر 4 چالان کیے گئے، شہری اکثر سگنل پر اسٹاپ لائن سے آگے کھڑے ہو جاتے ہیں

ای چالاننگ سسٹم باقاعدہ طور پر فعال کر دیا گیا ہے، ٹریفک پولیس حکام کے مطابق سسٹم کا مقصد چالان کرنا نہیں بلکہ قوانین پر عمل درآمد کروانا ہے۔ شہریوں سے اپیل ہے کہ ٹریفک قوانین کی مکمل پاس داری کریں تاکہ شہر میں ٹریفک کا نظام بہتر ہو اور حادثات میں کمی لائی جا سکے۔